MANILA (PIA) -- Gimando ni Presidente Ferdinand R. Marcos Jr. sa mga ahensya sa nasudnong kagamhanan sa pagtabang sa mga trabahante sa contract of service (COS) ug job order (JO) nga makakuha og permanenteng posisyon sa gobyerno.

Nanawagan usab si Marcos alang sa kolaborasyon tali sa mga ahensya sa gobyerno ug mga institusyong pang-edukasyon aron maandam ang mga trabahante sa COS ug JO alang sa mga eksaminasyon sa Civil Service Commission (CSC) aron mapalambo ang ilang kahanas ug kapabilidad.

Iyang gipalugwayan ang pakiglambigit sa mga trabahante sa COS ug JO kansang kontrata gitakdang mapupos sa kataposan sa tuig.

Sa pakigtagbo sa Department of Budget and Management, Department of Interior and Local Government, Commission on Audit  ug CSC sa Malacañang niadtong Abril 24, ang Presidente nanawagan sa mga ahensya sa gobyerno sa pagpalambo sa kahanas ug kapabilidad sa mga trabahante sa COS ug JO pinaagi sa pag-edukar pag-usab ug pagbansay kanila uban sa tabang sa mas taas nga mga institusyon sa pagkat-on aron sila mahimong kwalipikado sa mga permanenteng posisyon sa gobyerno.

“Pag-aralan natin, just look at the numbers, the data on average, government agencies. How many of their employees are contractual?” matud pa ni Marcos.

Ang Presidente nagkanayon nga sa kasinatian sa trabaho sa mga trabahante sa COS ug JO, nga daghan kanila dugay nang naa sa gobyerno, kinahanglang tabangan sila aron makuha ang gikinahanglang kwalipikasyon aron sila mabutang sa permanenteng posisyon. Sa maong paagi, dugang pa niya, makabaton sila og samang benepisyo sa mga anaa sa permanenteng posisyon.

Ang COS nagtumong sa pakiglambigit sa mga serbisyo sa usa ka indibidwal, pribadong kompanya, uban pang ahensya sa gobyerno, non-government agency, o internasyonal nga organisasyon isip consultant, tighatag sa serbisyo sa pagkat-on o eksperto sa teknikal aron maghimo og usa ka espesyal nga proyekto o trabaho sulod sa usa ka piho nga panahon.

Ang JO, sa laing bahin, nagtumong sa piece work (pakyaw), intermittent o emergency nga mga trabaho nga himoon sa mubo nga panahon ug alang sa usa ka partikular nga trabaho.

Niadtong Hunyo 30 sa miaging tuig, 29.68 porsyento (832,812) sa mga trabahante sa gobyerno ang mga trabahante sa COS ug JO,  29.71 porsyento nga pagtaas gikan sa 2022.

Ang nag-unang lima ka ahensya sa nasudnong kagamhanan nga adunay labing daghang COS ug JO nga mga trabahante naglakip sa Department of Public Works and Highways (DPWH), 29,275; Department of Health (DOH), 18,264; Department of Education (DepEd), 15,143; Department of Social Welfare and Development (DSWD), 13,770; ug Department of Environment and Natural Resources (DENR), 10,990. (ECB/PIA7 Bohol)