SAN JOSE, Antique (PIA) -- Ginbuksan kang gobyerno probinsyal kag mga sangay kang gobyerno ang “Kadiwa ng Pangulo” sa Evelio B. Javier (EBJ) Freedom Park sa banwa kang San Jose de Buenavista.

Ang Kadiwa ng Pangulo, ukon Katuwang sa Diwa at Gawa para sa Masaganang Ani at Mataas na Kita (KADIWA) ng Pangulo, sangka lihuk kang gobyerno sa pagtugro sa mga mangunguma, manugpangisda, kag gamay nga negosyante kang dugang nga oportunidad nga makabaligya kang andang produkto.

Pira sa mga produkto nga makita sa Kadiwa amo ang bugas, itlog, sibuyas, ahos, kamatis, saging, iban pa nga prutas kag laswa, native delicacies, kag iban pa nga mga produkto nga mabakal sa mas manaba nga presyo kumpara sa merkado.

Kadungan sa selebrasyon kang Tiringbanay Festival 2024, kapin 36 ka mga exhibitors ang nakigbahin sa Kadiwa ng Pangulo nga ginalakipan kang nanari-sari nga organisasyon kang mga mangunguma kag mangingisda kaangay kang Kamapat Agriculture Cooperative.

Sa pagpadayon kang epekto kang El Niño sa dyang probinsya, ginpasalamatan ni Doliguez ang Department of Agriculture (DA) para sa bulig kag suporta sa mga apektado nga mangunguma.

Ana man ginpangabay ang gilayon nga pag-abot kang tig-ururan para makabawi ron ang mga mangunguma sa andang kapirdihan.

Sa anang mensahe sa pagbukas kang Kadiwa ng Pangulo, ginpasalamatan ni Gov. Rhodora J. Cadiao si Presidente Ferdinand Marcos, Jr. sa pagpatigayon kang programa nga nagabulig tugro sa publiko kang preska kag barato nga mga produkto.

Ang Kadiwa ng Pangulo sangka kolaborasyon sa tunga kang Office of the President, Department of Agriculture (DA), Department of Trade and Industry (DTI), Department of Labor and Employment (DOLE), Department of Social Welfare and Development (DSWD), Department of the Interior and Local Government (DILG), National Food Authority (NFA), kag Provincial Government of Antique.

Nagtambong man sa aktibidad si Lone District of Antique representative Congressman Antonio Legarda, Jr. (AGP/BPS/PIA Antique)