TAGBILARAN CITY, Bohol (PIA) -- Ang Civil Service Commission (CSC) mo-issue og Career Service Eligibility – Preference Rating (CSE-PR) ngadto sa Contract of Service (COS) ug Job Order (JO) nga mga trabahante aron matabangan sila nga makabaton sa gikinahanglang eligibility aron makakuha og permanenteng posisyon sa gobyerno.
Agig tubag sa direktiba ni Presidente Ferdinand Marcos Jr. atol sa usa ka sectoral meeting bag-ohay lang, si CSC chairperson Karlo Nograles miingon nga ang CSE-PR ihatag ngadto sa mga kwalipikadong trabahante nga nakaserbisyo sulod sa labing menos 10 ka tuig ug nakapakita og bililhong kahanas apan kulang sa espesipikong eligibility alang sa mga posisyon sa plantilla.
“The CSC recognizes that many dedicated government employees, who have played a pivotal role in delivering public service over the years, do not possess the necessary civil service eligibility. Following the President’s directive, the CSC shall assist these qualified workers in various government agencies in their application for CSE-PR, enabling them to pursue plantilla positions," matud pa ni Nograles sa usa ka pahayag.
(Giila sa CSC nga daghang dedikado nga mga empleyado sa gobyerno, nga adunay dakong papel sa paghatod sa serbisyo publiko sa milabay nga mga katuigan, wala magbaton sa gikinahanglang serbisyong sibil nga eligibility. Subay sa direktiba sa Presidente, ang CSC motabang niining mga kwalipikadong trabahante sa nagkalain-laing ahensya sa gobyerno sa ilang aplikasyon alang sa CSE-PR, nga makapahimo kanila sa pagpadayon sa mga posisyon sa plantilla.)
Ubos sa CSC Resolution No. 2301123 nga giproklamar niadtong Disyembre 7, 2023, ang Preference Rating nga labing taas nga 10 puntos ang idugang sa napakyas nga rating range (70.00 hangtod 79.99) aron makab-ot ang passing rate nga 80.00 alang sa mga kwalipikado nga mga aplikante sa mga career service examinations, sa ingon mahimong kwalipikado sila alang sa Career Service Professional o Subprofessional nga eligibility.
Aron mahimong kwalipikado, ang mga aplikante kinahanglan nga nakatigom og labing menos 10 ka tuig nga serbisyo sa gobyerno, uban ang performance rating nga labing menos Very Satisfactory o katumbas niini sa duha ka pinakabag-o nga rating period sa dili pa ang petsa sa aplikasyon alang sa eligibility. (ECB/PIA7-Bohol)
