CEBU CITY, Cebu, January 30 (PIA) -- Sobra sa 500 mil ka indibidwal ang nakadawat og tabang sa Assistance to Individuals in Crisis Situation (AICS) sa Central Visayas sa 2023.
Kini maoy gibutyag sa Department of Social Welfare and Development Region 7 (DSWD 7).
Ang AICs usa sa mga social welfare services sa departamento nga naghatag og pinansyal nga tabang para suportahan ang mga indibidwal ug mga pamilya nga nakasinati og krisis.
Subay sa report sa DSWD 7 sa opisyal nga website sa departamento, aduna’y eksakto nga 500,190 ka mga indibidwal nga naserbisyuhan sa AICS Program sa Central Visayas sa tuig 2023.
Gipadayag sa DSWD7 nga sobra sa P2.4 billion nga AICS ang nahatag sa tuig 2023.
Ang programa naglakip sa lain-laing mga matang sa tabang sama sa medikal, paglubong, edukasyon, transportasyon, pagkaon, ug materyal, pinaagi sa salapi, mga food package, o usa ka guarantee letter.
Nahisgutan ni DSWD7 Regional Director Shalaine Marie Lucero nga 9,205 nga mga indibidwal naglangkob sa mga referrals gikan sa Malasakit Centers sa mga pangpublikong hospital.
Gipadayag usab ni Lucero nga ang ubang nga kliyente nga midangop sa assistance kay ang mga walk-in sa Crisis Intervention Section (CIS) sa DSWD sa Cebu City, SWAD offices sa ahensya sa Bohol, Negros Oriental, Siquijor, ug mga satellite offices nga nahimutang sa mga probinsya.
Lakip sa report sa ahensya nga ang AICS adunay 1,048 ka mga offsite payout sa tibuok rehiyon aron direktang ma-accommodate ang mga indibidwal nga gi-refer sa LGUs. (JAT/PIA7)
