ILIGAN CITY (PIA) -- Mokabat sa 222 ka mga residente dinhi ang nakapalit og barato nga bugas sa presyo nga P25 matag kilo gikan sa National Food Authority (NFA) atol sa Serbisyong Iliganon Caravan.
Gilimitahan ang mga residente sa pagpalit og 4 ka kilo nga bugas matag usa aron masiguro nga makapalit sab ang ubang residente.
Nalipay ang mga residente sa barato nga bugas. Usa na niini si Lucia Paghasian, 75 anyos nga vendor sa Tambo Market. Nalipay siya sa pagkahibalo nga makakuha siya’g upat ka kilo nga bugas sa iyang P100.
"Nalipay ko nga nakapalit og baratong bugas. Sa akong P100, naa nako’y upat ka kilong bugas. Kanindot ani, barato na, maayo pod nga klase,” matud pa niya.
Samtang, nipadayag sa iyang kalipay si Jella Bantilan nga taga-Barangay Saray, nga nakapalit og barato nga bugas, nga dakong tabang sa iyang pamilya.
Gipangunahan kini sa NFA sa pakigtambayayong sa City Agriculturist's Office. Ang mga interesado mahimong makapalit og barato nga bugas atol sa serbisyo caravan nga ipahigayon karong Pebrero 22, sa Pala-o Gym, Barangay Pala-o, Pebrero 27 sa Barangay Santo Rosario, ug Marso 12, 2024 sa Barangay Digkilaan.
Gipangulohan sa city government ang Serbisyong Iliganong Caravan sa pakigtambayayong sa nagkalain-laing ahensya sa gobyerno ug ubang stakeholders aron mapaduol ang lain-laing serbisyo ngadto sa katawhan. Ang caravan ipahigayon matag Martes ug Huwebes sa managlahing barangay. Ang caravan nagahatag og mga serbisyo lakip na ang medical ug dental consultations, libreng alot ug tuli, notarial ug legal nga tabang, pag-ayo sa sapatos, paghatag sa libreng reading eyeglasses, liso sa utanon, ug seedlings, ug uban pa. (LELA/PIA-10/Lanao del Norte)
Libreng reading eyeglasses gipanghatag sa mga residente sa Serbisyong Iliganon Caravan sa Iligan City. (Photo: ADD/PIA-10/Lanao del Norte)