CEBU CITY, Cebu (PIA) -- Nagpasiugda sa kamahinungdanon sa pagtukod og lig-on nga media partnerships aron makuha ang mensahe sa mga serbisyo sa gobyerno ngadto sa publiko, ang Department of Social Welfare and Development (DSWD)-7 miila sa pipila ka mga entidad ug personalidad sa rehiyon.
Ang DSWD-7 nipahigayon sa ilang labing unang ‘Media Pasalamat’ nga may tema nga “Keeping People Informed on Social Welfare and Development in the Ever-Changing Media Landscape” sa syudad sa Sugbo niadtong Pebrero 22, 2024.
Ang kalihokan sa ‘Media Pasalamat’ nagpasiugda og awarding ceremony alang sa mga outstanding media partners sa field office, lakip ang mga information officers sa Philippine Information Agency (PIA) Regional Office 7 nga sila si Hazel Gloria (PIA-RO7), Robinson Cabardo (PIA-RO7), Elvira Bongosia (PIA-Bohol) ug Roi Anthony Lomotan (PIA-Negros Oriental).
Kini nga mga pasidungog nagsilbi nga pasalamat sa DSWD7 sa industriya sa media sa Central Visayas tungod sa pagka-kasaligan nga kauban sa pagsumpo sa fake news; pagpaambit sa husto nga impormasyon ug mga update; ug pagtabang sa pag-edukar sa publiko bahin sa DSWD.
Sa iyang mensahe, gipresentar ni DSWD7 Regional Director Shalaine Marie Lucero ang mga kalampusan nga nakab-ot pinaagi sa mga nagkalainlaing programa ug serbisyo nga gipatuman sa ahensya.
Sa samang higayon, gipaila-ila usab ni Lucero ang mga bag-ong programa sa ahensya sama sa Oplan Pag-abot Program; Tara, Basa Program; Walang Gutom 2027: Food Stamp Program; ug Buong Bansa Handa.
Highlight sa ‘Media Pasalamat’ mao ang paghatag og plaque of appreciation sa mga kaubang government information agencies ug local media workers sa ilang makanunayong pagsuporta sa pagpakaylap og saktong impormasyon kabahin sa DSWD.
Kauban ni Lucero sila si Assistant Regional Director for Operations Juanito Cantero ug Assistant Regional Director for Administration Tonyson Luther Lee sa pagtunol sa plake sa mga gipasidunggan.
Ang labing una nga DSWD 7 ‘Media Pasalamat’ gipangunahan sa Social Marketing Unit, ang sanga nga buhatan alang sa advocacy, promotions, education, and communications. (ECB/PIA7 Bohol)
