SYUDAD SANG ILOILO (PIA6) – Gin-istoryahan sa isa ka pagsinapos sa syudad sang Iloilo ang posible mangin solusyon sa krisis sa kuryente sa bug-os nga isla sang Panay.

Sa pagsinapol sang Marso 7, 2024 nga gin organisar sang Iloilo City government, sa pagpanguna ni Mayor Jerry P. Treñas, kaupod si Iloilo Gov. Arthur Defensor Jr., mga tiglawas sang Department of Energy (DOE), power generators, National Grid Corporation of the Philippines (NGCP), More Power, kag iban pa nga mga lokal nga opisyales, ginduso sang mga stakeholders ang pagpatuman sang mga ancillary services sa isla sang Panay agod mapasiguro ang estable nga supply sang kuryente.

Ginalauman man nga antes matakop ang bulan sang Marso makumpleto naman ang Phase 3 sang sang (CNP) Transmission Upgrade sang NGCP.

Suno kay Phil Salarza, Manager sang NGCP Visayas Planning and Engineering "on track" ang ila pagtukod sang Phase 3 sang Cebu-Negros-Panay grid upgrade kag ginalauman nga matapos ini sa Marso 31.

Padayon man ang pag-energize sang NGCP sa pila ka mga linya sa rehiyon agod malab-ot ang target.

Sa pihak nga bahin, ginpahayag naman ni Defensor nga isa ka “national emergency” ang problema sa kuryente sa Panay, gani dapat lang nga aktuhan ini sang madasig para hindi na magdako pa ang mangin epekto sin isa publiko kag sa ekonomiya.

“We are very concerned because power is one of the fundamentals that the government should deliver to our constituents,” pahayag ni Defensor. (AAL/JNH/PIA Iloilo)