TAGBILARAN CITY, Bohol (PIA) -- Ang kamahinungdanon sa pagsuporta sa mga micro, small and medium enterprises (MSMEs) ug mga startup sa pag-akses sa mga merkado sa kapital, nga nagtumbok kanila isip nag-unang prayoridad sa administrasyong Marcos, gipasiugda atol sa Tagbilaran City leg sa Securities and Exchange Commission (SEC) Roadshow on Capital Formation alang sa mga MSME ug mga startup.
“We are one with President Ferdinand Marcos Jr. in recognizing that MSMEs are the backbone of a resilient national economy," matud pa ni SEC Commissioner Karlo Bello atol sa kalihokan nga gipahigayon niadtong Marso 7 sa Bohol Tropics sa syudad sa Tagbilaran.
(Kauban kami ni Presidente Ferdinand Marcos Jr. sa pag-ila nga ang MSMEs mao ang backbone sa usa ka lig-on nga nasudnong ekonomiya.)
Si Bello miingon nga ang SEC moadto sa lain-laing mga rehiyon aron mapaduol ang ilang mga serbisyo ngadto sa katawhan pinaagi sa pagpasiugda sa pagduso ngadto sa pinansyal nga institusyon.
Ang SEC roadshow nagtumong sa pagdugtong sa gagmay nga mga negosyo ngadto sa posibleng mga tigpundo nga magtugot kanila sa paglambo.
Sukad sa pagsugod sa roadshow sa miaging tuig sa Davao, adunay namatikdan nga pagsaka sa mga MSME nga malampuson nga migamit sa mga merkado sa kapital, nga nagtimaan sa usa ka maayong kaugmaon alang sa gagmay nga mga negosyo sa tibuok nasud, segun pa ni Bello.
Isip resulta sa serye sa mga roadshow niini niadtong 2023, ang SEC nakahimo sa pagdasig sa MSMEs sa pag-apil sa crowdfunding, nga nakamugna og minilyon nga kapital alang sa gatusan ka gagmay nga mga negosyo.
Ang crowdfunding usa ka pamaagi sa pagkolekta og pundo diin ang kwarta gikan sa daghang mga tigpamuhonan – kasagaran pinaagi sa online nga plataporma.
Gitugotan niini ang mga tigpamuhonan nga maka-akses sa mga oportunidad sa pamuhonan ug makapahimo sa mga MSME ug mga startup nga maka-akses sa mga bag-ong gigikanan sa pondo alang sa ilang mga negosyo.
Ang nationwide roadshow naghisgot usab sa mga opsyon sa financing pinaagi sa Philippine Stock Exchange (PSE) isip kabahin sa tumong sa komisyon nga 888@88.
Ubos niini nga katuyoan, ang SEC nag-target nga adunay labing menos 888 nga mga kompanya nga mag-tap sa kapital nga merkado sa panahon sa ilang ika-88 nga anibersaryo karong tuiga.
Tungod sa kalampusan sa mga roadshow, ang komisyon bag-o lang naglansad sa Call-a-Friend and Engage with SEC (CAFÉ SEC) nga plataporma, nga nagtugot sa mga nanambong sa roadshow nga makonektar sa mga tigpataliwala sa crowdfunding ug sa PSE alang sa mga pangutana kalabt sa ilang mga panginahanglanon sa panalapi, ug dugang nga impormasyon sa mga produkto ug serbisyo nga nakabase sa merkado sa kapital.
Ang mga representante gikan sa lisensyado nga crowdfunding intermediaries sa Pilipinas – Investree Philippines ug Eastern Securities Development Corporation (Round One), naghisgot sa mga bentaha sa crowdfunding ug sa unsang paagi ang MSMEs ug startups makagamit sa ilang mga serbisyo ug plataporma.
Gihisgotan usab sa mga opisyal sa PSE ug Investment and Capital Corporation of the Philippines (ICCP) ang mga benepisyo sa paglista sa stock market alang sa pagpalapad ug pagtubo sa negosyo.
Ang Tagbilaran roadshow gitambungan sa dul-an 150 ka mga negosyante nga nagbase sa Central Visayas kinsa nahatagan og higayon nga makigbahin sa one-on-one nga konsultasyon sa mga mamumulong atol sa break-out sessions.
Gitak-opan ang roadshow sa paglagda sa memorandum of agreement tali nila Bohol Island State University (BISU) President Dr. Anthony Penaso ug SEC Cebu Extension Office Director Sheara Lupango-Tamayo alang sa promosyon sa Financial Literacy ug Investor Education sa BISU. (ECB/PIA7-Bohol)
