TAGBILARAN CITY, Bohol (PIA) -- Agig suporta sa sektor sa agrikultura sa probinsya samtang ipausbaw ang seguridad sa pagkaon, gilusad ang Kadiwa ng Pangulo (KNP) sa lalawigan sa Bohol sa Marso 15.
Ang Kadiwa (Katuwang sa Diwa at Gawa para sa Masaganang Ani at Mataas na Kita) gipahigayon sa Old Tagbilaran Airport ning syudad.
Bukas kini gikan alas 9 sa buntag taman alas 7 sa gabii ug milanat kini taman sa Marso 17.
Gisalmotan kini sa 150 ka mga exhibitors — mga lokal nga mag-uuma, grupo sa mga mag-uuma, ug micro, small, and medium enterprises (MSMEs), nga nagbaligya og presko nga mga prutas, utanon, bugas, isda, karne, processed products, ug mga handicraft –sa barato nga presyo.
Gipangunahan sa Department of Agriculture (DA) ug hingpit nga gisuportahan sa Department of Interior and Local Government (DILG), Department of Labor and Employment (DOLE), Department of Trade and Industry (DTI), ug Department of Social Welfare and Development (DSWD), ang Kadiwa nagtumong sa pagwagtang sa mga tigpataliwala sa supply chain, pagpalig-on sa mga sumpay sa merkado, ug pagsiguro sa barato nga pag-akses sa presko nga mga produkto.
Ang paglusad niadtong Biyernes sa alas 9:30 sa buntag didto sa Old Tagbilaran Airport gipangunahan sa amahan sa lalawigan, Gob. Erico Aristotle Aumentado.
Gitambungan usab kini sa mga mayor sa kalungsoran ug mga regional directors sa DILG, DA, DTI, DOLE, ug DSWD.
Pinasidunggang dinapit sa paglusad si Presidential Assistant for the Visayas Usec. Terence Calatrava, apan nagpadali hinuon kini sa mga representante.
Ang KADIWA, nga gipasiugdahan ni Presidente Ferdinand Marcos Jr., usa ka market linkage facilitation program nga gitumong sa paghimo sa agri-products ug uban pang mga nag-unang panaliton nga maabot ug mapalit sa mga kabus.
Nagtinguha usab kini nga magtukod og dugang nga merkado alang sa mga mag-uuma ug mangingisda nga direktang makabaligya sa ilang mga produkto ug makadugang sa ilang kita.
Gihatagan usab niini ang mga mag-uuma, mangingisda ingon man ang mga MSMEs nga libre nga mga lugar aron ibaligya ang ilang mga produkto ug madugangan ang ilang kita. (ECB/PIA7 Bohol)
