SYUDAD SANG ROXAS, Capiz (PIA) -- Ginapahanumdom sang Bureau of Internal Revenue (BIR) Revenue District Office No. 72 ang mga manugbayad sang buhis sa probinsya nga Abril 15, 2024 na ang deadline sang 2023 Annual Income Tax Return.

Ginpahayag sang hepe sang RDO No. 72 sang BIR nga nakabase sa Roxas City nga si Nelia B. Demalata nga mas labing maayo kon magbayad sang ila nga buhis ang mga natungdan sa mas temprano sa deadline agud nga malikawan ang mga malaba nga pinilahan sa mga bangko subongman mga Revenue Collection Officers sa mga kabanwahanan kag iban pa nga mga sentro sa pagbayad sang buhis.

Ang RDO ang magapahamtang man sang mga Tax Tulungan Center sa CityMall Roxas Avenue, Ground Floor sang SM City Roxas, kag Robinsons Place nga lunsay diri sa syudad kaangot sa Abril 15 nga ITR deadline.

Ang nasambit nga Tax Tulungan Centers ang maga-umpisa sa Marso 23 tubtob Abril 15, 2024 magluwas lang sa Domingo kag Semana Santa.

"Ang tanan nga mga taxpayer ang sarang makabisita sa mga Tax Tulungan Center sa mall sa oras nga 10:00 sa aga tubtob alas 5:00 sa hapon para sa ila mga palamangkutanon kag pagpangayo sang bulig sa pag-file sang ila ITR," dugang pa ni Demalata.

Samtang ang RDO sa kalye McKinley sa Roxas City ang bukas man tagsa ka Sabado ilabi na sa Marso 23, Abril 6, kag Abril 13.

Nahibaluan nga pinaagi sa Memorandum of Agreement, ang otorisado sang BIR nga mga bangko ang magabukas man sa adlaw sang Sabado ukon Abril 6 kag Abril 13 agud magbaton sang tax returns ukon bayad sang mga taxpayers.

Kalakip diri amo ang Bank of the Philippine Islands (Arnaldo Boulevard kag Roxas Avenue Branch), Chinabank, Development Bank of the Philippines (DBP), Landbank of the Philippines, Philippine National Bank (Roxas Avenue kag Magallanes Branches), Philtrust kag Metrobank (Roxas Avenue kag Arnaldo Blvd Branches).

Dugang pa, ang mga taxpayer ang pwede man magkontak sa BIR RDO No. 72 nga mga numero (036) 6216552 kag 6216554 ukon magpadala sang mensahe pinaagi sa Facebook page, birrdo072roxascity, para sa ila mga palamangkutanon kag problema sa pagbuhis. (AGP/AAL/PIA Capiz)