GUINSILIBAN, Camiguin (PIA) -- Aron mapausbaw ang trabaho sa mga graduates gikan sa Camiguin School of Arts and Trades (CSAT), ang Technical Education and Skills Development Authority (TESDA) Camiguin miapod-apod og 49 ka toolkits para sa Tile Setting NC II ug Bread and Pastry Production NC II niadtong Marso 13 sa Barangay Cantaan, Guinsiliban.

Ang mga iskolar nakadawat usab ug libre nga pagbansay, pagtasa, ug padayon nga suporta, nga nagpadako sa ilang mga kahigayonan sa kalampusan sa ilang gipili nga mga natad.

“Through ani nga training, mahimo gyapon mong professional in your own way, nana mo’y skill, nana mo’y ma-develop nga skill nga makuha nimo og pangitaan, income kay ang Camiguin baya more on tourism, so gusto niya (Rep. Jurdin Jesus Romualdo) nga walay pobre dinhi sa Camiguin," miingon si TESDA Camiguin Acting Provincial Director Lonie Gonzaga.

Si Gonzaga midugang nga ang mga benepisyaryo niini nga inisyatiba mao ang mga iskolar nga na-enrol sa 2023 Special Training for Employment Program (STEP Scholarship), nga nahimong posible pinaagi sa congressional allocation ni Romualdo.

Si Provincial Board Member Shella Babanto ang mitambong usab sa maong kalihukan ug nagdasig sa mga benepisyaryo sa paggamit sa mga himan nga gihatag kanila.

“During sa inyong training ang intention is for us gain knowledge and skill nga mas ma-develop pa ang atoang mga talents sa pagluto, baking, pastry, ug mas makabalo ta mag-tiles,” matod ni Babanto.

Gipahinumduman usab ni Gonzaga ang mga benepisyaryo nga ampingan ang mga himan nga gihatag kanila, tungod kay ang ahensya kanunay nga magmonitor kung ang mga himan anaa pa sa mga benepisyaryo.

Sa pagpaambit sa iyang pasalamat sa mga himan nga ilang nadawat, si Criza Pagute, usa sa mga benepisyaryo, miingon, "Magamit na jud namo ang among mga nakat-onan pinaagi sa mga toolkit nga kanang gwapa. After all the waiting, at least maka-mekus-mekus. na jud mi."

Ang pasalig sa TESDA Camiguin sa pagsangkap sa mga indibiduwal sa gikinahanglang mga himan ug kahanas alang sa mabungahong panarbaho nagpakita sa mas halapad nga paningkamot ngadto sa pagpalambo sa ekonomikanhong paglambo ug kauswagan sa probinsiya. Pinaagi sa kolaborasyon nga mga paningkamot ug gipunting nga suporta, ang mga inisyatibo nga sama niini nagpadayon sa paghulma sa usa ka hayag nga kaugmaon alang sa mga trabahante sa Camiguin, si Gonzaga miingon. (RTP/PIA-10/Camiguin)