TAGBILARAN CITY, Bohol (PIA) -- Gideklara sa Malacañang nga half-day lamang ang trabaho sa tanang buhatan sa gobyerno sa Marso 27 o Miyerkules Santo.

Subay sa Memorandum Circular 45 nga gilagdaan ni Executive Secretary Lucas Bersamin, bukas ang tanang buhatan sa gobyerno hangtod alas 12 sa udto lamang sa Miyerkules.

“To provide government employees full opportunity to properly observe Maundy Thursday and Good Friday, work in government offices on 27 March 2024 is hereby suspended from 12:00 o’clock in the afternoon onwards,” base sa circular nga gilagdaan ni Bersamin.

Tumong sa maong memorandum nga hatagan og panahon ang mga kawani sa gobyerno nga makabiyahe pauli sa ilang mga probinsya alang sa pag-obserbar sa Semana Santa.

Apan giklaro sa circular nga walay labot niini ang mga kawani sa gobyerno kansang trabaho naglambigit sa emergency response ug naghatag og basic health services.

Samtang gitugyan usab sa Malacañang ngadto sa pribadong sektor ang pagsuspenso sa trabaho sa ilang mga negosyo. (ECB/PIA7-Bohol)