SYUDAD SANG ILOILO -- Isa sa mga prayoridad nga programa sang gobyerno probinsyal sang Iloilo sa idalom sang MoRProGRes Iloilo ukon Movement for a Robust, Progressive, Globally Competitive and Resilient Province of Iloilo development agenda ang paghatag sang safe, bastante kag matinlo nga suplay sang tubig sa komonidad.

Nangin benipisyaryo ang Barangay Bondulan kag Santol sang banwa sang San Dionisio angot sa ginapatuman nga Rural Water Supply and Sanitation Project sang gobyerno probinsyal agud mahatagan solusyon ang isyu tuhoy sa kakulangan sang tubig.

Nagabalor sa P746,102 ang proyekto sa Barangay Bondulan kun sa diin nalakip ang improvement of existing water lines kag pagtakod sang bag-o nga mga linya. Ginalauman nga magaserbe ini sa 70 ka mga panimalay.

“Isa ka handum sang aton Gobernador nga maamat-amat tagaan sang malimpyo nga tubig kita nga mga pumuluyo sang probinsya sang Iloilo,” pahayag ni Andig.

Dako naman ang pagpasalamat ni Mayor Darwin Bajada sa gobyerno probinsyal sa mga madamo nga mga proyekto nga ginpatigayon sa banwa sang San Dionisio.

Madumduman nga ginturn-over ni Gov. Defensor ang pondo nga naglab-ot sa P5 milyon para sa water system nga proyekto sang banwa.

Sa bahin ni Gov Defensor, iya nga ginhinyo ang mga benepisyaryo nga masustinir ang water system.

“Atendiron ninyo ang pag-usar sang tubig naton kay maiwat ini sa iban nga barangay. Gakahubsan kita tasok kag dako ina nga problema. Congratulations kay na sustinir ninyo ang tasok diri sa inyo nga barangay,” mensahe ni Defensor.

Ginpangunahan ni Gov. Defensor ang isa ka inauguration ceremony sang pagtukod sang water system sa duwa ka mga barangay kaupod ni Mayor Bajada, Vice Mayor Emma Perez kag iban pa nga mga lokal nga opisyal. (AAL/LMLE/PIA Iloilo/Balita Halin sa Kapitolyo)