TAGBILARAN CITY, Bohol (PIA) -- Malipay ang Bureau of Fire Protection (BFP) kon may mga eskwelahan ug mga institusyon o establisemento nga moduol kanila aron magpatabang sa paghimo sa fire drills, ug maghatag og katakus sa ilang mga trabahante pagpamatay sunog.

Kini maoy gibutyag ni Fire Supt. Raul Busataliño, didto sa Kapihan sa PIA nga naghisgot sa pagpugong sa sunog atul sa Fire Prevention Month.

Ang pahayag ni Bustaliño, subay usab sa tema sa Fire Prevention Month nga “Sa pag-iwas sa sunog, hindi ka nag-iisa,” ug sa ilang padayong gipalapad nga kampanya sa OPlan Ligtas na mga Komunidad.

Importante ang tinabangay sa tanan nga sector: gobyerno, barangay, mga propesyonal kay ang gimbuhaton sa fire prevention dili lamang kana obligasyon sa BFP, kinahanglan kini nga tabangan sa tanan aron wala mahiagum sa kadautan, saysay niya.

“Kon bombero lamang ang saligan, aduna lamay 660 ka mga lumilihok nga bombero, 126 niini, mga babaye pa,” dugang niya didto sa forum nga live streamed sa internet, samtang iyang gipalubad ang kadaku sa risgo sa mga kababayen-an kon maoy ipasagubang sa pagpamatay sa sunog.

Niini usab, iyang gihatagan og gibug-aton ang pagpanginlabut sa mga komunidad, alang sa mas luwas sa sunog nga mga pinuy-anan.

Nag-una niining nga bansay mao ang pagmugna ug pagtukod og mga community fire auxiliary groups o fire brigades o fire volunteers, matud pa ni Bustaliño.

"Duna kita’y gitawag og bombero sa barangay, sama nga ang PNP adunay polis sa barangay, ang BFP usab may Bombero sa Barangay, nga nakaassign ug usa sa ilang mga functions mao ang paghimo sa pagfire-inspection, magconduct og fire protection planning," butyag niya.

Dili diha-diha dayon moabut ang atong mga firetrucks so samtang nagpaingon pa ang atong mga responding units, duna nay trained volunteer groups makahimo og pasiuna nga mga conventional fire fighting, niya pa.

Giangkon usab sa hepe sa kabomberohan sa lalawigan sa Bohol nga ang daku nga hagit, mao ang pagresponde sa  mga sunog didto sa mga kaislahan, butang nga makatabang ang mga community fire auxiliary groups (CFAG). 

Apan, dili kay sa pagpasagad sa daku nga hagit, gikasabut na sa BFP Bohol ang alayon sa Special Forces Riverine Batallion kinsa adunay mga kapasidad sa mga speed boats, nga makatabang sa pagresponde sa mga sunog sa kaislahan.

Sa mainland Bohol, kompleto na ang 47 ka lungsod ug syudad sa mga fire fighting apparatus, apil na ang sakyanan sa bombero nga may kargang tubig.

Gani, dugang niya nga 22 sa 100 ka mga fire fighting apparatus mga state of the art fire trucks ug duha ka bag-ong ambulansya.

Gawas sa pagsumpo sa kayo ug sunog, ang BFP may mandatus usab sa emergency medical services, hinungdan nga gikinahanglan niini ang mga ambulansya.

Gawas niana, nagpasugod na sa pagpabarug sa mga standard fire stations sa mga kalungsuran, bisan pa man nga ipabarug na usab ang Office of the Provincial Fire Marshal ug fire station didto sa Cortes, ug  ang Regional Fire Training Center didto sa 1.3 hectare nga luna nga gihatag sa goberno didto sa Ubay.

Niining tanan usab, mapasalamaton si Supt Bustaliño sa daku nga tabang ni Fire Director Louie Suralta Puracan, kinsa maoy nasudnong director sa BFP, kinsa usab taga Trinidad, Bohol. (RAHC/PIA7 Bohol)