DUMAGUETE CITY, Negros Oriental (PIA) -- Gipasigarbo sa mga kawani sa Bureau of Fire Protection (BFP) ug pipila ka mga miyembro sa barangay fire brigade sa Rehiyon Siyete and ilang kahanas sa pagresponde sa sunog ug pagpalong sa kalayo sa gipahigayong BFP Regional Fire Olympics dinhi sa dakbayan.

Nahitabo kini niadtong ika-18 sa Abril adto sa Pantawan Area sa Rizal Boulevard.

Niabot sa 180 ka mga bumbero sa BFP kauban ang mga miyembro sa barangay fire brigade, barangay fire auxiliary, ug industrial fire brigade gikan sa mga lalawigan sa Cebu, Bohol, Negros Oriental, Siquijor, Cebu City, Mandaue City, ug Lapu-lapu City ang nitambong sa Regional Fire Olympics.

Adunay upat ka dibisyon ang Regional Fire Olympics na naglangkob sa victim packaging and transfer, bucket relay, donning doffing, and up the ladder, ug truck push challenge.

Matud ni BFP7 regional director CSupt. Roberto Genave, dili lang usa ka kumpetisyon alang sa mga kawani sa ahensya ang Regional Fire Olympics kon di usa ni ka paagi pod aron mapalig-on ang relasyon sa BFP ug komunidad.

Unsa pod ni na pamaagi sa pagpaambit sa katawhan sa mga unsay angay buhaton alang sa pagpalong sa kalayo.

“This is a program not only to showcase their skills. It’s more of an assessment of their capabilities and (what) need(s) to be improved,” matud ni Genave.

“It’s not more of a competition. One of the essence of this is for us to have inter-operability. So we can work with each other. We are now within a circle of system that could provide basic and needed services not only in case of fire but in other emergencies as needed,” dugang pa ni Genave.

“Kung atong tan-awon ang atong regional fire Olympic, part of the categories are the barangay fire brigade and barangay fire auxiliary group. This two categories part ni siya sa atoang programa na Oplan Ligtas na Pamayanan. Mao ni sila ang na-train na ngadto sa atong community as a responder,” matud sab ni provincial fire marshal Supt. Noel Nelson Ababon.

“Basic lang ang atong gi-train sa ilaha: patient packaging and the bucket brigade o kung unsaon nato pagpalong sa usa ka sunog na wala man tay fire truck. Usa ni sa atoang adbokasiya to train this community as our first responder while waiting for the professional responders,” dugang pa ni Ababon.

Subay niini, gipahinumduman ni Ababon ang katawhan na motawag usa sa BFP kon adunay sunog na mahitabo bag-o kini ipasalida social media pinaagi sa mga live video.

Matud sab ni Barangay Calindagan chair Rolando Zaldy Egera, usa pod ni sa paagi na mabansay ang mga miyembro sa komunidad alang sa pagresponde og sunog.

“Ang ato pod gipangkuha ang atong mga batan-on para dali pa sila makaresponde gyud. Kani siya gitudlo pod kung unsa pagpalong kung adunay panghitabong sunog sa atong barangay,” sigun ni Egera.

Gipanguluhan ni Egera ang barangay fire brigade sa Calindagan na niapil sa maong kumpetisyon.

Gisaksihan sa mga opisyal sa Dumaguete City ug sa lalawigan sa Negros Oriental ang maong fire Olympics. (RAL/PIA7 Negros Oriental)