TAGBILARAN CITY, Bohol (PIA) -- Nipahimangno ang Cybercrime Investigation and Coordinating Center (CICC) sa publiko sa pagkaylap sa reward scam nga nagtakuban nga gikan sa Globe Telecom nga nang-phishing sa personal ug bank details sa mga biktima.

Si CICC Executive Director Alexander K. Ramos niingon nga ang domain, globeeph.top nangbiktima sa mga kustomer pinaagi sa short message service o SMS.

Ang SMS nag-ingon: “The globe points service reminds you that your current points account (3,022 points) will expire today. Redeem your points as soon as possible: https://globeeph.top/i Please reply Y then exit SMS, open the SMS to activate the link again, or copy the link to the Safari browser and open it

Ang serbisyo sa mga puntos sa globe nagpahinumdom kanimo nga ang imong kasamtangang puntos nga account (3,022 puntos) matapos karong adlawa.

Pagtubos sa imong mga puntos sa labing dali nga panahon: https://globeeph.top/i Palihug tubaga ang Y unya exit sa SMS, ablihi ang SMS aron maaktibo pag-usab ang link, o kopyaha ang link sa Safari browser ug ablihi kini).

Sa higayon nga ma-click sa mga kustomer ang domain, gikinahanglan sila nga maghatag og personal nga mga detalye ug numero sa bank account aron matubos ang ilang mga puntos.

Matud pa ni Ramos nga ang fraud team sa CICC nirekomendar sa pag-block sa domain ug nisaad nga padayong pahimangnoan ang publiko bahin sa SMS fraud ilabi na kadtong gikan sa dili opisyal nga tinubdan.

Gidugang niini nga walay hinungdan sa alarma, apan isip bahin sa protocol, girekomenda nila ang pag-block sa domain aron malikayan ang pagbiktima sa daghang mga kostumer.

Ang anti-fraud network, ang Gogolook nagklasipikar sa globeeph.top isip usa ka "dangerous link.”

“High -risk content detected. Do not click. The URL may contain security issues and attempt to phish for your personal info and money,” pamahayag sa Gogolook’s URL Scan.

Ang mga biktima sa phishing giawhag sa pagtawag sa 1326, ang hotline sa Inter-Agency Response Center (IARC). (ECB/PIA7-Bohol)