Nagpangabay sa kabataan ang tagpamaba kang Philippine Coast Guard (PCG) nga si Commodore Jay Tarriela nga suportahan ang kawsa kang gobyerno sa West Philippine Sea (WPS).

Sa anang mensahe sa strategic communications workshop kang Philippine Information Agency, nagpabutyag kang pagsarig si Tarriela nga kabalak-an kang kabataan ang West Philippine Sea.

Paagi man sa transparency strategy, tuyo kang gobyerno nga makatipon kang suporta halin sa international community kag iririmaw nga magpanawagan sa Tsina nga kilalanon kag respetohon ang international maritime law para sa ikamayad kang rehiyon.

Para sa mga estudyante kang University of Antique (UA) nga sanday Manilyn Valentin kag Jeizel Rieve Pillado, apisar kang kalisud sa pagpangabuhi, kinahanglan kang tanan nga magkabalaka kag makigbahin sa pagprotekta kang West Philippine Sea bangod ang manggad kadya para sa tanan nga mga Pilipino.

Dugang pa nanday Valentin kag Pillado, importante ang partisipasyon kang kabataan sa dyang isyu bangud indi lang ekonomiya ang pwede maapektuhan kundi ang seguridad kag soberanya kang pungsod.

Kaangay sa pagpakigbato kang mga baganihan kang una nga tyempo para sa Pilipinas, nagapati si Tarriela nga ti-on duman para sa mga Pilipino kang dya nga henerasyon nga protektaran ang pungsod batok sa mga pagpamahog kag opresyon.

Paagi sa matuod nga impormasyon tuhoy sa WPS sa idalom kang transparency strategy kang gobyerno, ginapanindugan ni Tarriela nga maagom kang pungsod ang kinahanglanon nga suporta halin sa mga Pilipino, ilabi ron sa mga kabataan nga bwas-damlag kang Pilipinas. (AGP/BPS/PIA Antique)