TAGBILARAN CITY, Bohol (PIA) -- Gi-awhag sa Department of Agriculture-Central Visayas (DA7) ang mga kabatan-onan sa pagpahimos sa ilang Summer Youth Internship Program (SYIP) 2024 o Government Internship Program (GIP).
Ang maong programa naghatag og kahigayonan sa mga kabatan-onan nga makaapil ug masinati ang mga programa ug proyekto sa gobyerno ingon man paghatag ug hinabang pinansyal alang sa sunod nga school year enrolment.
Aron mahimong kwalipikado, ang mga aplikante kinahanglan nag-edad 18 hangtod 25 anyos, naa sa maayong panglawas, adunay labing menos 1st dose sa booster, wala’y kalabotan sa consanguinity o affinity sa bisan kinsa nga opisyal o empleyado sa opisina, kinahanglan dili usa ka kanhing partisipante sa DA SYIP/GIP (walay mga partisipante ang ma-recruit/dawaton labaw sa kausa).
Alang sa mga aplikante nga estudyante, kinahanglang college level o gradwado sa high school. Kung ang mga aplikante mga out-of-school youths, dili unta sila mohunong sa pag-eskwela sulod sa kapin sa 2 ka tuig ug alang sa mga differently abled nga mga indibidwal, sila makahimo sa pagbuhat sa mga bulohaton sa opisina sama sa pag-type/encoding, sorting, photocopying, ug uban pa.
Sa napulo ka malamposong intern, upat ang madistino sa regional office ug duha sa matag usa alang sa PATCOs sa Bohol, Negros Oriental ug Siquijor.
Ang mga interns mo-report sulod sa 45 ka adlaw nga pagtrabaho gikan sa Hunyo 2 hangtod Agosto 5, 2024, nga magsagop sa regular nga oras sa pagtrabaho gikan alas 8:00 sa buntag taman alas 5:00 sa hapon gikan sa adlaw’ng Lunes hangtod Biyernes.
Ang mga interesado nga mga batan-on nga aplikante kinahanglan nga mosumite sa usa ka nahuman nga Personal Data Sheet/Application Form CY 2024 https://tinyurl.com/ApplicationFormSYIP2024, dili molapas sa Abril 30, 2024, nga e-address ngadto kang: Angel C. Enriquez, CESO III Regional Executive Director Department of Agriculture-VII Maguikay, Mandaue City, Cebu.
Giklaro sa DA nga ang pagsumite pinaagi sa social media (Facebook) dili ma-accommodate o makonsiderar. (ECB/PIA7-Bohol)
