TAGBILARAN CITY, Bohol (PIA) -- Ang Provincial Inter-Agency African Swine Fever (ASF) Task Force nagpatuman og revised traffic scheme alang sa mga sakyanan nga mosulod ug mogawas sa isla sa Panglao sugod niadtong Abril 24.

Ang Causeway Bridge gigamit una sa pagsulod sa isla sa Panglao.

Sa laing bahin, ang Jacinto Borja Bridge gigamit isip exit point gikan sa Panglao diin anaa ang border controls.

Ang mga nag-unang checkpoint gibutang sa intersection sa AA's BBQ ingon man sa crossroad sa Coco Grove Hotel.

Usa usab ka secondary checkpoint ang nahimutang sa Dauis Junction Police Outpost.

Alang sa trapiko sa syudad sa Tagbilaran, gipahinumdoman ang mga motorista nga gikan sa CPG East Avenue (PASONANGKA) gitugotan nga moliko sa wala paingon sa Causeway Bridge.

Samtang ang M. Pahang Street (padulong sa Camella Homes) maglihok isip one-way nga dalan hangtod sa CPG East Avenue (JETTI Gasoline station) lamang.

Kalabot niini, si Gob. Erico Aristotle Aumentado padayon nga naghangyo sa publiko sa pagsabot ug pagpailob ning inconvenience nga nasinati, gumikan sa mga inisyatibo sa kagamhanang probinsyal sa pagpugong sa pagkuyanap sa ASF nga nakasulod sa tulo ka barangay sa lungsod sa Dauis. (ECB/PIA7-Bohol)