SYUDAD SANG ILOILO (PIA6) – Liwat nga ginpahayag sang lokal nga panguluhan sang probinsya kag syudad sang Iloilo ang ila suporta sa mga programa sang Department of Interior and Local Government (DILG) kontra ilegal nga droga.

Sa isa ka programa sang Abril 20, ginpahayag ni Defensor ang iya suporta sa DILG sa idalom sang liderato ni Secretary Benjamin Abalos Jr., kung sa diin iya man ginhatagan importansya ang paglunsar sang physical activities, parehas sang fun run, para malikawan ang paggamit sang ilegal nga droga.

“In our campaign against drugs, suppression is not enough kay we also need options, may alternatives nga ginahatag sa pumuluyo. The good news is that the option is easy and enjoyable because the option is lifestyle, just like sports and other physical activities,” siling ni Defensor.

Sa piyak nga bahin, ginkilala man ni Abalos ang manami nga imahe sang syudad kung kampanya kontra ilegal nga droga ang pagaisturyahan bangud malayo na gid ini kung ikumpara sa ginbansag sang una nga “shabulized city.”

Dugang pa sini nga ginahatagan gid sang administrasyon sang importansya ang kabuhi sang tanan kag dapat nga masunod ang proseso sang batas sa kampanya kontra ilegal nga droga.

“For me the greatest solution is not building jails, the greatest solution is making sure that people would not go back to jail. We are serious in cleaning this in a legal way. I emphasized the legal way because life is so precious,” pahayag ni Abalos.

Ara sa syudad si Abalos sang Abril 20 para magtambong sa ginhiwat nga “Buhay Ingatan, Droga’y Ayawan” fun run sang city government, kung sa diin masobra 8,000 ka indibidwal halin sa nanari-sari nga sektor ang nakipagbahin. (AAL/JNH/PIA Iloilo)