SAN JOSE, Antique (PIA) -- Ginapangabay kang Philippine Statistics Authority (PSA) ang publiko nga magtugro kang matuod nga impormasyon sa ginahiwat nga 2024 Labor Force Survey (LFS) nga may mga pamangkot angot sa turismo kag indi bayad nga ubra (unpaid work).

Ang LFS ginahiwat kadya sa 44,000 ka sample households sa bilog nga pungsod kag may katuyuan nga magtipon kang datos halin sa populasyon nga mahimo gamiton sa pagplano kag pagbuhat kang mga polisiya kag programa kang gobyerno para sa ikamayad kang labor sector.

Sa Antique, kapin 388 ka sample households ang bisitahon kang statistical researchers halin sa Antique Provincial Statistical Office para sa sangka computer-aided personal interview (CAPI) halin Abril 8 tubtob 30.

Sa bahin kang turismo, ang mga pamangkot tuyo magtipon kang dugang nga impormasyon tuhoy sa tourism employment, kaangay kang “employment in other tourism-related enterprises”, “tourism employment on a local level”, kag “employment variables” kaangay kang sex, edad, gintapusan sa pag-eskwela, ubra, kag employment status.

Suno sa PSA, importante ang tourism information bangud ang sektor kang turismo nagatugro kang duro nga oportunidad para sa mga Pilipino.

Samtang, ang pamangkot sa unpaid work tuyo magtipon kang datos parte sa unpaid activities kang lalaki kag babaye sa panimalay, kaangay kang pag-atipan sa pamilya kag ang oras sa pag-buhat kadya.

Hambal kang PSA, ginakabig kang United Nations (UN) nga sangka kritikal nga isyu sa sosyodad ang “unpaid care and work” sa panimalay sandig sa Sustainable Development Goal (SDG) No. 5 nga “Achieve gender equality and empower all women and girls.”

Ginapanugyan gid ang publiko nga ekspektaron ang statistical researchers sa mga komunidad kag magpartisipar paagi sa pagsugid kang matuod nga impormasyon sa survey.

Ginsiguro man kang ahensya nga protektado ang tanan nga datos sa idalom kang Section 26 kang Republic Act 10625 ukon Philippine Statistical Act of 2013. (AGP/BPS/PIA Antique)