BAROY, Lanao del Norte (PIA) -- Giablihan na ang gipanindot nga Tourism Plaza Freedom Park dinhi niadtong  Abril 25. 

Mukabat sa P10 million ang budget para niini. Napondohan kini sa tabang sa opisina ni Sen. Christopher Lawrence "Bong"  Go isip vice chairperson sa Senate Committee on Finance.

Pipila lang kini sa mga infrastructure ug community development projects nga gisuportahan sa opisina sa maong senador.

Sumala sa  municipal government sa Baroy, dugangan pa kini og mga dekorasyon nga kolon nga himoon sa mga residente kay ilado ang lungsod isip Clay Town.

“Naa na siya’y kolon  para mailhan nga Baroy jud siya.  Dagko kaayo. Upat sa fountain. Gituyo nako na siya kay gusto nako ma-highlight ang history sa Baroy. Gawas ana, naa pod diha puhon ang mga product sa Baroy. Hopefully in the long run, amo jud makab-ot among pangandoy sa Baroy,” sumala ni Mayor Grelina Mantohac-Lim.

Nalipay sab ang mga residente sa mas nindot nga park sa ilang lungsod.

"Nagpasalamat mi nga na-improve na ang plaza. Lahi na jud kaayo karon kay sauna dili ni in-ani. Karon nindot na jud siya. Lipay kaayo mi, hamugaway na among plaza," sumala ni Jonaphe Rodriguez.

Gawas sa infrastructure projects, suportado sab ni Go ang panglawas sa katawhan pinaagi sa pagduso sa Malasakit Center program.

 "It is a one-stop shop. Nasa loob ito ng ospital, apat na ahensya ng gobyerno: Philhealth, PCSO, DOH at DSWD. Meron kayong malasakit center ito sa Kapatagan, Iligan at Cagayan de Oro City. Duola lang ninyo ang center. Unsa ang kwalipikasyon  sa Malasakit Center? Basta Pilipino ka qualified ka, para jud na sa Pilipino,” sumala ni Go.

Tuig 2019 dihang naaprobahan nga mahimong balaod ang Malasakit Center pinaagi sa Senate Bill No. 1076 kon Malasakit Center Act of 2019.  (LELA, PIA Region 10 -Lanao del Norte)