CEBU CITY, Cebu (PIA) -– Misaad ang Department of Social Welfare and Development (DSWD) isip chair sa Inter-agency Task Force on Zero Hunger (IATF-ZH) sa ilang padayon nga pagtrabaho kauban ang ubang hingtungdan nga mga kauban ug uban pang ahensya sa gobyerno sa pagsulbad sa kagutom sa nasud.
Kini human migawas ang bag-ohay nga taho sa Social Weather Stations (SWS) human sa survey niini nga misaka ang kagutom sa nasud sa unang tulo ka buwan niining tuig.
Matud pa sa SWS survey nga gihimo niadtong Marso 21 ngadto 25, nakita nga aduna’y 14.2 pursyento nga pamilyang Pilipino ang nakasinati og involuntary hunger, diin mas taas pa sa 12.6 pursyento nga nasinati sa Disyembre 2023.
Tukma sa gipagawas nga Memorandum Circular (MC) No. 47 kaniadtong Abril 19 nga nagmando sa tanang ahensya ug instrumentalidad sa gobyerno sa pagsuporta sa Enhanced Partnership Against Hunger and Poverty (EPAHP) Program nga maong usa sa mga banner programs sa IATF-ZH sa pagkab-ot sa Zero Hunger ug pag-angkon og food and nutrition security.
Matud pa ni Assistant Sec. for Disaster Response Management Group ug DSWD Spokesperson Irene Dumlao nga dili lang tahas sa usa ka ahensya sa gobyerno o usa ka task force ang pagsulbad sa kagutom ug kakabus sa nasud, kun dili ang tibuok burukrasya pinaagi sa whole-of-government approach.
Dinhi misaad si Dumlao nga kauban na sa Malacañang kinatibuk-ang burukrasya sa DSWD sa pagsulbad sa kagutom.
“The MC will fast track the implementation of anti-hunger initiatives and ensure that these efforts will achieve results with the whole government working together and sharing resources,” miingon si Dumlao.
[Mapadali sa MC ang pagsubay sa pagpatuman sa mga inisyatibo batok sa kagutom ug pagsiguro nga kini nga mga paningkamot makab-ot ang mga resulta uban sa tibuok gobyerno nga magtinabangay ug magpaambit sa mga kahinguhaan.]
Gawas sa EPAHP, magpadayon ang ahensya sa DSWD sa mga programa ug serbisyo niini nga makatampo sa whole-of-government approach against hunger.
Duha sa mga programa mao ang Pantawid Pamilyang Pilipino Program (4Ps) ug ang Walang Gutom 2027: Food Stamp Program (FSP).
Ang 4Ps ang maong flagship program sa nasudnong gobyerno aron sa pagpakunhod sa kakabus ug pagpatuman sa mga kalamboan para sa katawhan. Ang kini nga programa mohatag og cash grants ngadto sa mga hilabihan ka kabus nga mga panimalay aron sa pagpalambo sa tagsa-tagsang panglawas, nutrisyon, ug edukasyon hilabi na sa mga bata nga ang edad gika 0 ngadto sa 18.
Sa laing bahin, ang FSP kay usa sa mga prioridad sa administrasyon ni Marcos aron sa pakigbatok sa involuntary hunger o kagutom pinaagi sa paghatag og dugang na pagkaon alang sa mga 1 milyones ka mga panimalay nga naa sa ubos sa Listahanan 3 ug kinsa nasakop sa food-poor criteria sumala sa gihubit sa Philippine Statistics Authority (PSA).
Palapdan usab ang pagpatuman sa FSP karong Hulyo gikan sa 3,000 ka benepisyaryo ngadto sa 300,000 sa tibuok nasud.
Sa pag-implementar sa Supplementary Feeding Program (SFP), nakig-alayon usab ang DSWD sa mga local government units (LGUs) aron matuman ang tumong sa moang program sa paghatag og masustansya nga meryenda o snack ug init nga pagkaon aron madugangan ang regular nga pagkaon sa mga bata nga na-enrol sa Supervised Neighborhood Play (SNP) ug child development centers (CDCs). (JJT/PIA 7)
