SYUDAD SANG ILOILO --  Madamo sang mga posible nga mga proyekto nga makapasanyog sang turismo ang mahimo nga obrahon sang syudad sang Iloilo kaupod ang Department of Tourism (DOT).

Nagpakigpulong si Tourism Secretary Christina Garcia Frasco kay Iloilo City Mayor Jerry Treñas tuhoy sa mga partnerships sa bahin sang tourism infrastructure kag inisyatibo sa route development agud makaganyat sang mga bisita.

Si Frasco ang nangin dinapit nga bisita sang syudad sa kahiwatan sang Tourism Development Plan (NTDP) 2023-2028 rollout sa Visayas cluster.

Suno kay Frasco, nagakabagay nga ginhiwat sa Iloilo ang rollout sang NTDP bangud sa maayo nga palaabuton sang syudad kag probinsya sa patag sang pagpasanyog sang turismo nga ginahatagan pagtamod sang mga local government units.

Sa pihak nga bahin, ang rollout sang NDTP nagaserbe nga blue print sang gobyerno sa pagtukod sang industriya sang turismo sa masunod nga lima ka tuig nga tul-id sa kultura, palanubli-on, kag kina-iya sang Pilipino

“In the spirit of President Marcos’ economic aspirations for the Philippines, the NTDP is not just the plan, but a dynamic framework that requires all of us, our active engagement from policymaking to grassroots implementation,” mensahe ni Frasco.

Gindihon man ang NTDP paagi sa mga input sang mga stakeholders sa pungsod nga ginlakipan sang DOT, mga talatapan, ahensya sang gobyerno, local governments ilabi pa ang nagikan sa tourism sites, non-governmental organizations, mga pribado nga sektor kag industry groups.

Sa pihak nga bahin, nagpabutyag man sang suporta si Gov. Arthur R. Defensor, Jr. sa pagroll-out sang NTDP 2023-2028. Ginpahayag man ni Defensor ang pagpakig-angot sang probinsya sa DOT.

“We are very thankful for this rollout because our work here today is to see where we are in this National Development Plan and our role and participation in this tourism development plan of the Department of Tourism,” suno kay Defensor. (AAL/LMLE/PIA Iloilo)