TAGBILARAN CITY, Bohol (PIA) -- Ang Bol-anong pintor nga si Elvin Perocho Vitor makadawat sa nabantog sa tibuok kalibotan nga Leonardo da Vinci International Art Prize karong Abril 14 sa Milan, Italy.
Ang iyang "Bulawanong Bol-anon Series" nga mga dibuho, uban sa iyang nakadaog nga obra, ang 53×89-pulgada, hyper-surreal nga hulagway sa kaubang Boholano nga pintor ug environmentalist nga si Pedro Angco, nakapadayeg sa mga hurado sa pag-angkon sa prestihiyosong award.
Ang Leonardo da Vinci World Award of Arts gihatag sa mga inila nga mga artist kansang trabaho naglangkob sa usa ka mahinungdanon nga kontribusyon sa artistic nga kabilin sa kalibotan pinaagi sa internasyonal nga mga artist nga miyembro sa World Cultural Council.
Si Vitor bag-o lang namatikdan online ug sa internasyonal nga komunidad tungod sa iyang hyper- surrealistic oil paintings nga mao ang 'Madagayaong Takna' ug 'Handuraw Sa Bulawanong Damgo.'
Atol sa pagbukas sa Arts Month exhibit nga gipahigayon niadtong Pebrero 23, gipaambit ni Vitor kung giunsa niya pagkahimong pintor, pinaagi sa impluwensya sa iyang amahan ug nganong gipili niya ang hyper-surrealism art.
“Akong gi-fuse ang hyperrealism ug surrealism para naay konsepto. Ug naay concept, mas better kay naay meaning, naay message, ug naay impact,” matud pa ni Vitor.
Gipadayag usab niya ang kontribusyon sa iyang amahan sa iyang artistikong panaw.
“Nag-start akong interest sa art when I was a kid, kay akong papa nag-drawing-drawing sauna. When I was in elementary, akoa na gyud gibutang sa akong yearbook nga gusto ko mahimong artist. Same pod pag high school, and then karon naay manifestation nga nahimo kong professional artist,” dugang niya.
Gihisgutan usab niya nga ang iyang hilig sa arte tungod sa kahimtang sa iyang mata.
“Daot kog mata. I have a high level of myopia. Nearsighted ko, maong ganahan kog colors,” pasabot ni Vitor.
Sa dihang gipangutana kon unsa nga tambag ang iyang mapaambit sa mga batan-ong aspiring Boholano artists, si Vitor nipasabot nga nagkinahanglan kini og pag-agi sa proseso.
Gipasalamatan ni Vitor ang kagamhanang probinsyal sa Bohol nga naghatag og oportunidad nga mailhan ang mga Boholano pinaagi sa visual arts.
Kahinomduman nga gigahinan og P5 milyon ang Governor's Mansion nga nahimutang sa dalan CPG North Avenue aron i-renovate kini aron mahimong art gallery center nga giaprobahan sa Aumentado administration.
Ang maong sentro mopakita sa mga obra sa Boholano artists ug andam nga mahimong tourist destination sa UNESCO Global Geopark island province.
Sa dili pa modawat sa iyang pasidungog sa Abril 13, si Vitor mopahigayon og solo nga exhibit sa Abril 12, diin ang 50 porsyento sa iyang kinitaan igahin alang sa bungol ug buta nga komunidad sa Bohol. (ECB/PIA7-Bohol)
