SYUDAD SANG ILOILO (PIA) – Nagpaandam ang Iloilo City Health Office (CHO) sa publiko batok sa makalalaton nga Pertussis ukon “whooping cough” bangud sa nagasaka sini nga kaso sa syudad.

Sa isa ka press conference, ginrekomendar sang CHO ang pagpabaskog sang adbokasiya kag information dissemination angot sa importansya sang complete childhood immunization bangud ang nasambit nga respiratory disease ang pwede man malikawan pinaagi sa pagpabakuna.

Pabaskugon man sang ahensya ang case detection and reporting of cases sa mga public kag private health facilities.

Sa datos sang CHO, may lima na ka kumpirmado nga kaso sang Pertussis sa syudad humalin Enero 1 tubtob Marso 16, 2024, kung sa diin tatlo diri ang gikan sa Molo kag duha ang gikan sa distrito sang Jaro.

Bangud sini, ginrekomenda sang Health and Sanitation Cluster ang pagdeklara sang Pertussis outbreak sa mga distrito sang Molo kag Jaro. Ini bangod man sa gulpi nga pagsaka sang kaso sa 400 percent, mas mataas kung ikumpara sa isa lang ka kaso sang bug-os nga tuig 2023.

Natalana nga paga-istoryahan sa isa ka pagsinapol sang City Disaster Risk Reduction and Management Council (CDRRMC) ang rekomendasyon sang Health and Sanitation Cluster. (AAL/JNH/PIA Iloilo)