CEBU CITY, Cebu (PIA) -- Gihapsay na sa mga organizers inubanan sa kapulisan og lokal nga kagamhanan ang tanang mga pagpangandam niini alang sa pagpahigayon sa usa ka dakong aktibidad, ang giatngan nga triathlon event nga Ironman 70.3 Lapu Lapu nga ipahigayon sa Lapu-Lapu City karong Abril 21.
Sa gipahigayon nga Emergency Preparedness and Response Meeting nga gitambongan sa mga member agencies sa Regional Disaster Risk Reduction and Management Council 7 (RDRRMC-7) response cluster niadtong Abril 15, gi presentar sa mga nag-unang ahensya nga nangulo sa pagpahigayon sa Ironman 70.3 ang ilang mga security and safety preparations lakip napud ang medical response niini alang sa pagsiguro sa hapsay, malinawon, og luwas nga pagpahigayon sa dakong aktibidad nga pagasalmotan sa liboan ka mga tawo.
Ang Lapu-Lapu City Police Office miingon nga anaa sa kinatibuk-ang 1,768 ka mga personnel ang ilang ipakatap nga maoy mobantay sa seguridad, kalinaw, og moabag sa mga atleta nga mosalmot sa maong kalihokan.
Kini nga mga personnel naggikan sa kapulisan, disaster risk reduction management office (DRRMO), rescue unit, partner agencies, og sa bahin sa mga organizers.
Kabahin niini, gisiguro usab sa kapulisan sa Lapu-Lapu City nga walay hulga sa seguridad sa mga adlaw kung diin ipahigayon ang Ironman 70.3 Lapu Lapu ug hugot ang ilang pagbantay nga ipatuman sa mga lugar o ruta nga pahigayonan sa nasangpit nga aktibidad.
Matod sa mga organizers, anaa sa 1,708 ka mga atleta lakip na ang mga langyaw nga naggikan sa 54 ka mga nasod ang gilauman nga mosalmot sa Ironman 70.3 nga naglangkob og tulo ka events, ang bike course, swim course, og run course.
"The organizers have already coordinated with the LGUs for the security and safety measures, medical response, and other significant preparations related to the conduct of IronMan 70.3,"sigon ni Julian Valencia ang operations manager sa Ironman 70.3 Lapu Lapu.
(Ang mga organizers nakig-alayon na sa mga LGU alang sa mga lakang sa seguridad ug kaluwasan, pagtubag sa medikal nga mga panginahanglan, ug uban pang mahinungdanong pagpangandam nga may kalabotan sa pagpahigayon sa IronMan 70.3.)
Samtang, ang Lapu-Lapu City Disaster Risk Reduction Management Office o DRRMO sa ilang bahin mipadangat usab sa ilang kaugalingon nga pagpangandam isip suporta og tabang ngadto sa malampuson nga pagpahigayon sa Ironman 70.3 Lapu Lapu.
Ang Lapu-Lapu City DRRMO magbutang og Emergency Operation Center og Incident Command Post sa mga venues isip pamaagi sa pagtunol og tabang og pagtubag sa mga lain-laing kinahanglan nga may kalambigitan sa seguridad, kahapsay, og mismong sa aktibidad.
Mag deploy usab sila og mga ambulansya, fire suppression team, search and rescue team, ug mga emergency first responders nga andam moabag sa mga partisipante og mga organizers.
Sa Abril 18, adunay ipahigayon nga send-off ceremony alang sa tanang mga personnel nga gitahasan alang sa Ironman 70.3 Lapu Lapu nga maoy ika 10 ka higayon nga kining maong aktibidad ipahigayon sa nahisgotang dakbayan. (RGC/PIA7 Cebu)
