CEBU CITY, Cebu April 15 (PIA) -- Gihapsay na sa lokal nga kagamhanan sa Lapu-lapu City inubanan sa kapulisan og sa  Disaster Risk Reduction Management Office ang mga pagpangandam niini alang sa pagpahigayon sa maong lungsod sa ika-503 nga pagtimaan sa “Kadaugan sa Mactan”  karong Abril 27.

Sa gipahigayon nga Emergency Preparedness and Response Meeting nga gitambongan sa mga member agencies sa Regional Disaster Risk Reduction and Management Council 7 (RDRRMC-7) response cluster niadtong Abril 12, gi presentar sa Lapu-lapu City Police Office ang ilang mga security and safety preparations lakip na niini ang deployment plan sa ilang mga personnel, kini alang sa pagsiguro sa hapsay, malinawon, og luwas nga pagpahigayon sa dakong aktibidad nga pagasalmotan dili lang sa mga Sugbuanon apan apil napud ang naggikan sa laing bahin sa nasud, mga langyaw, og mga turista.

Ang Lapu-Lapu City Police Office miingon nga anaa sa kinatibuk-ang 453 ka mga security personnel ang ilang ipakatap nga maoy mobantay sa seguridad, kalinaw, og moabag sa mga partisipante nga mosalmot sa maong kalihokan.

Kini nga mga personnel naggikan sa kapulisan, disaster risk  reduction management office (DRRMO), rescue unit,  partner agencies, og mga uban pang force multipliers.

Kabahin niini, gisiguro usab sa kapulisan sa Lapu-Lapu City nga walay hulga sa seguridad sa mga adlaw kung diin ipahigayon ang “Kadaugan sa Mactan” ug hugot ang ilang pagbantay nga ipatuman ngadto sa mga venue  nga pahigayonan sa nasangpit nga aktibidad.

“When it comes to the preparations, all systems go na, na set na tanan nga mga pagpangandam, as well as the contingency plans, emergency and medical team nga mo respond to any incident, ready na pud nga i deploy sa atong venue” matod sa representante sa Lapu-lapu City Disaster Risk Reduction and Management Office.

Ang Lapu-Lapu City DRRMO magbutang usab og Emergency Operation Center og Incident Command Post sa Mactan Shrine nga mao ang venue sa kalihokan, isip pamaagi sa pagtunol og tabang og pagtubag sa mga lain-laing kinahanglan nga may kalambigitan sa seguridad, kahapsay, og mismong sa aktibidad.

Inabagan sa Department of Health (DOH), mag deploy usab sila og mga ambulansya, medical teams, ug mga emergency first responders nga andam motabang sa higayon nga adunay manginahanglan og dinaliang tabang atol sa maong kalihokan.

Gilauman sa Lapu-lapu City DRRMO og Lapu-lapu City Police Offfice nga anaa sa liboan ka mga tawo ang motan-aw sa “Kadaugan sa Mactan” og usa sa mga gi imbitar nga motambong mao ang Presidente Ferdinand Marcos Jr. (RGC/PIA7 Cebu)