SYUDAD SANG ROXAS, Capiz (PIA) -- Nagbaton sang madamo nga pagkilala sa nutrisyon ang banwa sang Sapian sa "1st Capiznon Pasidungog sa Nutrisyon" nga ginpatigayon sang Provincial Health Office (PHO) sa Circulo Hill Complex sang Pueblo de Panay diri sa syudad sang Roxas.

Nahibaluan nga nagpanguna ang Sapian sa 16 ka iban pa nga lokal nga pangulohan sa probinsya sa mga kategoriya sang Best Local Health Offices and Best Communal Garden, Highest Coverage in Operation Timbang Plus (OPT Plus), kag Lowest Prevalence of Malnutrition nga mga pasidungog.

Ginpahayag ni Atty. Jose Villanueva nga alkalde sang Sapian nga ang edukasyon kag nutrisyon ang kalakip sa 7-point agenda sang banwa bangud ang nasambit nga mga programa ang magadala sa direksyon sang banwa nga ginatutokan sa karon.

“You cannot expect a good learner who is malnourished. Therefore it is my policy to put important emphasis on nutrition,” ang pahayag ni Villanueva nga nagpa-in sang P1 milyon para sa nutrisyon nga programa sa nahauna nga tuig sang iya administrasyon.

Samtang ang iban nga mga LGU nga ginkilala sa 1st Capiznon Pasidungog sa Nutrisyon amo ang banwa sang Dao nga 2nd place, subongman banwa sang Pontevedra nga 3rd place sa Best Local Health Offices and Communal Garden Award.

Ang banwa sang Dumarao ang nakakuha man sang pangduha nga pwesto kag Roxas City sa pangtatlo nga lugar sa Operation Timbang Plus Award.

Ginkilala ang health nurse sa banwa sang Dao nga si Mary Kristine Canja bilang Outstanding Municipal Nutrition Program Coordinator Awardee kag Barangay Nutrition Scholar nga si Barbara Venus sang Brgy. Sto. Anghel sa banwa sang Dumalag bilang Outstanding Provincial Barangay Nutrition Scholar Awardee.

Dugang pa, ang Top 3 Local Nutrition Action Officer Awardees amo sanday Michelle Urzos nga health nurse sang Dao, Luisita Legarda nga midwife sang Sapian, kag Dr. Ana Mae Belasoto nga Municipal Health Officer sang banwa sang Dumalag.

Ginpaabot naman ni Gov. Fredenil Castro ang iya pagpanginbulahan sa mga awardees bilang dinapit nga bisita kag humalambal sang kahiwatan.

“Let me commend you for a job well done in so far as the nutrition of our province is concerned. You are all heroes of our nutrition program,” ang pahayag sang gobernador.

Matandaan nga ginpataasan ni Gov. Castro ang allowance sang mga Barangay Nutrition Scholar, Barangay Health Workers kag Barangay Service Point Officers sa probinsya sa P1,500 tagsa ka kwarter humalin sa P1,000.00 tagsa ka tuig sa idalom sang iya administrasyon.

Ang program ang gintambongan man nanday Dr. Ramon Alex Nolasco nga Provincial Health Officer sang Capiz, Dr. Leah Del Rosario nga Provincial Nutrition Action Officer sang Capiz, Romela Cadoliza nga Program Development Officer sang National Nutrition Council 6, mga katapu sang Provincial Nutrition Council, kag madamo nga iban pa. (AGP/AAL/PIA Capiz)